Tjabelstünj – fresk radio ütj Kil

Daalang maad ik hal ans en betj werew för en fein saag: radio üüb fresk, wat ei bluat ‚üüb fresk‘ as, man uk – ja was! – cool!

Uk wan Kil ei uun Nuurdfresklun leit, woort hir dach uun di ään of ööder huk fresk snaaket. Fööraal bi’t fääk ‚Frisistik‘ kem bi a uni lidj tuup, wat det spriak uun Nuurdfresklun of bi a uni salew liard haa. Bi’t ‚Wurdenbuksteed‘ haa uk Mareike, Franziska, Hauke an Nickels enööder keenenliard an – tuup mä a Offene Kanal Kiel – beslööden, dat at en fein saag wiar an maage en fresk radioprogram uun Kil.

Tjabelstünj het detdiar program nü, wat auer Kiel FM an auer Westküste FM tu hiaren as an wat wel fööraal madelual lidj (so üs mi) uunspräächt. A teemen san gans bruket:
at gongt am musiik, filmen an literatüür an a bääftgrünjer diartu, am politiik, neis ütj a komunikatsjuuns- an technikwelt, am Kil an at leewent algemian. Ik koon goor ei rocht sai, wat min lefst rubriik as. „Wat en Leedji fortelt“ mei ik hal of uk, wan buken föörsteld wurd. Ik riad imer hal, hoker hün liitje ütjsoocht hää. Arken faan jo sjauer stüürt nemelk sin aanj teemen an sin lefst musiik tu. Miasttidjs kön ham mark, hoker hün stak ütjfreeden hää. Det paaset tu’t bruket bilj faan’t hiale, auer uk a spriaken waksle. Hauke snaaket eentelk öömrang, jüst so üs Nickels, Mareike iarer frasch an Franziska för’t miast salring – man jo kön uk ööders! Arke letj stak as bit nü uun ian spriak realisiaret wurden, det het, dat Nickels uk ans üüb frasch skandiaret of Mareike hör fein fering hiar läät. Det hää ham oober iintesken anert, nü wurd a spriaken uk misket. Fööraal för jodiaren, wat (noch) ei gans so seeker uun a fresk saadel sat, jaft at bääft arke bidrach en kurt tuupfaadang üüb sjiisk.

Gesamten Artikel online lesen oder Print-Ausgabe bestellen

Tesk un bil:
Dr. Wendy Vanselow
Abteilung für Frisistik an der Christian-Albrechts-
Universität zu Kiel, in Zusammenarbeit mit dem
Nordfriisk Instituut, Bräist/Bredstedt