Desag hünjdaar – verrückte Hundetage

So üs föl saagen, am wat lidj uun dethir tidj skriiw, as uk min teema ei gans originel: wi maad hal weder en hünj haa, man hünjer san ütjferkääft. Ik hed jo föör juaren al ans am min leew tew skrewen, man hat as sant fiiw juar duad an wi mast ham imer noch. An nü, huar niks luas as, maad wi ale uu so hal ans weder en muschlag skan aije. Wi san al miast arken dai uun a ‚tiirholtang‘, wat üüb sidj faan üüs aran leit, an aije a tsiigen an ale ööder tiaren, wat wi oner a fangern fu. Man irgendhü lingt det ei. An do soocht wi so biletjen am en neien hünj. Lefst ään, wat ei efter ööder tiiren bääftefterjaaget (luke efter bi det stak am man ual hünj…) an wat ei so grat as an ei so hiaret. An do san wi üüb en puudel kimen. Ja, wan ham en puudel orntelk at hiar klapt, do sjocht hi nögen an ei nüürag ütj an en puudel harket gud asw. Man jolsalew soochter haa ale öödern tutudjs uk an sodenang skriiw a pudel-züchtern uun’t internet uk bluat noch saagen üüs: Rep’em üs ei muar uun! Ale puudler san wech! Ja, uk ale enkelpuudler! Wat nü? Ik haa natüürelk ei harket an tilefoniaret an emails tu lidj skrewen, wat för 2021 nei letj puudler ferwachte. Jo saad altumaal atsalew: Ik skal imer ans weder efterluke, of at wat neis üüb a homepage jaft, an do skal ik gau wees. Gau mä wat? Mä betaalin? Diar wiar jo nimer so düütelk … An sodenang luke ik nü stödag bi hög sidjen efter, bluat am diar tu leesen, dat Schoko an Rambo imer noch bluat freid haa an jo jo üüb letj suart puudler frööge. Diartu sä ik en bruket fotomontasje mä tau brün hünjer föör en tiakent bradleps-szenerii – jo luke muar of maner ferliibet. So widj as’t al kimen!!!

ütjferkääft – ausverkauft
tew – Hündin
skan – Fell
aije – streicheln
meut – Mühe
huk – Ecke
bäären – geboren



Tekst an bil: Dr. Wendy Vanselow. Christian-Albrechts-Universität zu Kiel, in Zusammenarbeit mit dem Nordfriisk Instituut, Bräist/Bredstedt